23, జులై 2016, శనివారం

రావయ్యా ఈ‌ జీర్ణకుటీరము ...





రావయ్యా యీ‌ జీర్ణకుటీరము
పావనముగ జేయ - వేగమె
రావయ్యా నీ నిజభక్తునకు
దీవన లందీయ బిరబిర


నిదురను గూడ నిన్ను మరువక
ఎదురు చూచుచు నిన్ని యుగంబులు
పదిలముగా శుభభావన నిలిపిన
యెదలో ఆశల నింకగ నీకుము
రావయ్య

నీ కృపచే నిట నిర్మిత మైనది
నాకు నెలవుగ నీవు చేసినది
నీ కటాక్షమున నిలచియున్నది
చీకి కూలి ధర చేరక మునుపే
రావయ్యా

సువిశాలంబును సుందరమగు నొక
భవనము గాదిది పాతయిల్లె నీ
కవరోధము వలె హాయి గొల్పగా
సవరించితి నే శక్తికొలదిగా
రావయ్యా






1 వ్యాఖ్య:

  1. ముఖ్యగమనిక: నేను అన్నిరకాల బ్లాగువివాదాలనుండి దూరంగా ఉండాలని నిశ్చయించుకున్నాను. ప్రత్యక్షంగా కాని పరోక్షంగా కాని అలాంటి ప్రయత్నాలకు ఎవరు దోహదం చేసినా నాకు చేతనైనంతగా దూరంగా జరగుతాను.

    'శ్యామన్న వైదొలగెనుర !' అంటూ ఎవరైనా ఎందుకు వ్రాయవలసి వచ్చిందో నాకు తెలియదు తెలుసుకోవాలన్న ఆసక్తీ లేదు. వీలువెంబడి ఆలోచిస్తానంటే అది వైదొలగటం అని ప్రచారం చేయటం దేనికో వైరబుధ్ధి కాకపోతే అని ఆశ్చర్యంగా ఉంది. మంచిది అలాగే వైదొలగుతున్నాను. వేలకొలదీ కవితలు వ్రాసివుంటారని కితాబులందుకున్న రససిధ్ధులని కూడా పేరొందినవారో మరొక మహాత్ములో‌ ప్రయత్నిస్తారేమో. నాకు ఎవరికీ అడ్డునడిచే ఉద్దేశం లేదు.

    శ్రీనివాసుడుగారూ, మీరు పంపిన వ్యాఖ్య వెనుక నన్ను ఏదైనా వివాదంలోనికి ఇరికించే‌ ఉద్దేశం ఉందని నేను అనుకోవటం‌ లేదు. కాని నన్ను వివాదాల్లోనికి లాగాలని ప్రయత్నించేవారు ఎలాంటి అవకాశమూ వదలుకోరు కాబట్టి నా జాగ్రత్తలో నేను ఉండవలసి వస్తున్నది. కాబట్టి మీరు పంపిన వ్యాఖ్యలు రెండూ కూడా తొలగిస్తున్నాను.. వాటిని మీరు భాష్యం చెప్పగలరని నమ్మకం ఉన్న చోట అందుకు సిధ్ధంగా ఉన్నవారి వద్ద అడగటం‌ మరింత ఉచితంగా ఉండవచ్చును. క్షంతవ్యుడను - ఈ విధంగా కూడా నన్ను కొందరు వివాదంలోనికి లాగాలని చూడటాన్ని నిరసించటం తప్ప మరేమీ చేయలెక పోతున్నాను.

    నేను వీలు వెంబడి నాధోరణిలో‌ ఏది వ్రాయగలనో అది వ్రాయటానికి యత్నిస్తాను.

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.