15, జులై 2015, బుధవారం

మౌనముగ రాముని మనసున ధ్యానింపుము




మౌనముగ రాముని మనసున ధ్యానింపుము
మానక ధ్యానింతు వేని మంచి జరుగును



వారి వీరి మాటలకు బదులు పలుక కుండుము
ఊరక నిందించు వారి నేరమెంచ బోకుము
కారులఱచు వారలకు దూరముగ నిలచి
పారమార్థికము నిచ్చు దారిలోన నుండుము
మౌనముగ

కర్మముచే కలుగుచుండు కష్టములు సుఖములు
ధర్మపరుడవై నీవు దాశరథిని తలచుము
నిర్మలాంతఃకరణము నీవు దాల్చి యుండుము
నిర్మములను దాశరథి నిత్యము రక్షించును
మౌనముగ

భూమి నెవరు గాని నిన్ను బ్రోచు వారు కాదు
రామరక్ష తప్ప ధరను రక్ష వేరు లేదు
ధీమంతులకు భువిని కామితములు లేవు
రామదాసులకు నిజము రాముడొకడు చాలు
మౌనముగ