9, ఏప్రిల్ 2015, గురువారం

రామ రామ రామ యనుచు నామభజన చేయుటలో






రామ రామ రామ యనుచు నామభజన చేయుటలో
ఏమి రుచి ఏమి సుఖము ఏమి శాంతి ఓ మనసా




ఆ మాటను కైకసిసుతు డైన విభీషణు డెఱిగి
శ్రీమంతుడు గుణవంతుడు శ్రీరామచంద్రహితుడు
నీమ మొప్ప రఘువరు శుభనామంబు నుపాసించి
భూమి మీద చిరాయువై పొలిచె కీర్తిమంతుడై
రామ



సామీరియు నిరతంబును రామచంద్రవిభుని మ్రోల
నామజపానందనిమగ్నాంతరంగు డగుచు నుండి
భూమిసుతావరుని మెప్పు పొంది యుప్పొంగు చుండి
యా మహాత్ము డాగామిని యధివసించు బ్రహ్మపదము
రామ



పరమయోగిగణంబులును పాకశాశనాదిసురలు
సరసిజభవపరమశివులు సతతము కీర్తించునట్టి
పరమపదావహము పతితపావనంబు నై యెసంగు
నిరుపమాన నామ మెఱిగి  నిర్మలశుభనిష్ఠ మెఱయ
రామ






వ్యాఖ్యలు లేవు:

వ్యాఖ్యను పోస్ట్ చెయ్యండి

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.