24, మార్చి 2015, మంగళవారం

నేనేమి చేయుదు నయ్య






నేనేమి చేయుదు నయ్య నీ దయ రాక
జ్ఞాన మెన్నడు రాదు జానకినాథా




జ్ఞానము లేక నే సర్వేశ్వరుని నిన్ను
లో నెఱుంగక పాడులోకమె నిజమని
మానక దీని యందె మ్రగ్గుచు నుంటిని
పూని ఇప్పటి కైన బ్రోవరా వయ్య 
నేనేమి


భక్తికే గాక నీవు వశుడవు కావని
యుక్తి బోధింతురట యోగులు లోకభోగ
రక్తుడ నగు నాకు రామ నీ పాదాను
రక్తి మేలన్న బుధ్ధిరా దేమందు నయ్య
నేనేమి


మేలు చేకూర్చని మెట్టవేదాంతము
నాలో నిండుట జూచి నవ్వెదు కాని
నీ లీల చే గాదె నే నిల నుండుట
చాలు చాలును విజ్ఞాన మీయ వయ్య
నేనేమి





2 వ్యాఖ్యలు:

  1. >>> నేనేమి చేయుదు నయ్య నీ దయ రాక !

    శ్యామలీయా ! నా ప్రతిబింబ మీవు ! ఇట్లా నేనేమి చేయుదు ననుట నీకు తగునా ! 'నేను' ని వదులుము ! నన్నే నీవు గా అనుకొనుము ! దయయును నీవే ! పాత్రుడవు ను నీవే !

    శుభోదయం
    'స్వామీ' వారు !

    ప్రత్యుత్తరంతొలగించు
    ప్రత్యుత్తరాలు
    1. చిత్తం చిత్తం. ఈ మాట మరో కీర్తనకు దారితీస్తుందేమో!

      తొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.