1, డిసెంబర్ 2014, సోమవారం

అమ్మ - తెలుగు





ఆదరించేవాళ్ళు లేక అమ్మ చచ్చిపోతోంది
పలకరించేవాళ్ళు లేక తెలుగు చచ్చిపోతోంది.

అంతగా అన్నవస్త్రాలు అవసరమా అన్నది ఒక ప్రశ్న
అన్నిఅక్షరాభరణాలు అవసరమా అన్నది ఒక ప్రశ్న

అమ్మా అని పిలవకూడదూ అని బళ్ళల్లో హెచ్చరించి చెబుతున్నారు
తెలుగులో మాట్లాడితే శిక్ష తప్పదని కూడా కఠినంగా చెబుతున్నారు

ఇప్పటికే అనేకానేకమంది అమ్మలు మమ్మీలుగా మారిపోయారు
ఇప్పటికే తెలుగమ్మ కూడా చాలావరకూ డమ్మీగా మారిపోయింది

పాలిచ్చి పెంచి అవసరాలు తీర్చేందుకు అమ్మ ఒక పనిముట్టుగా మారిపోయింది.
సరదాగా మాట్లాడి వినోదంగా చూసేందుకు తెలుగు ఒక పనిముట్టుగా మారిపోయింది.

కేవలం మనిషైనందుకు అమ్మకు పనిముట్టు అన్న అగౌరవవాచకం మాత్రం వాడం
కేవలం జీవం లేనిదేకదా అనిపించినందుకే తెలుగుకు మాతృగౌరవం కూడా ఇవ్వం

మాతృమూర్తి ఒక పనిముట్టు అనిపించుకోని పనిముట్టు
మాతృభాష తెలుగు మనం గొప్పవాళ్లం కాబట్టి ఒక పనిముట్టు

పడి ఉండకపోతే అమ్మని బయటకి విసిరేస్తున్నారు ఆధునికులు
నోటికి పట్టుబడకపోతే తెలుగును చీరి ఆరేస్తున్నారు ఆధునికులు

అమ్మ మనం చెప్పినట్లు వినాలి కదా ముసలిదైపోయిన తరువాత
తెలుగు మనం కోరినట్లు మారాలికదా మనం మారమన్న తరువాత

మారని మాతృమూర్తిని ఎవరు మాత్రం ఎంతకాలం ఆదరిస్తారు పాపం
మారనంటే మాతృభాషని ఎవరు మాత్రం ఎంతకాలం ఆదరిస్తారు పాపం

అందుకే మన ఆధునికతాప్రీతి దెబ్బకు లోకంలో అమ్మ చచ్చిపోతోంది
అందుకే మన ఆధునికతాప్రీతి గొప్పకు లోకంలో తెలుగు చచ్చిపోతోంది

మాతృమూర్తి అనిపించుకున్నందుకు ఆ పిల్లల చేతిలో ఏదన్నా కాక తప్పదు కదా
మాతృభాష అనిపించుకున్నందుకు ఈ జనం చేతిలో ఏదన్నా కాక తప్పదు కదా

అందుకే, ఆదరించేవాళ్ళు లేక అమ్మ చచ్చిపోతోంది
అలాగే, పలకరించేవాళ్ళు లేక తెలుగు చచ్చిపోతోంది.





20 వ్యాఖ్యలు:

  1. తెలుగు భాషకి యాబై ఆరు అక్షరాలు అనవసరమా?
    ref:http://harikaalam.blogspot.in/2014/12/blog-post.html

    ప్రత్యుత్తరంతొలగించు
    ప్రత్యుత్తరాలు
    1. చదువుతానండి. కాని ఆ విషయమై నా అభిప్రాయాలు రచ్చకెక్కి చర్చకు పెట్టేందుకు ఆసక్తి లేదు. ఈ గీతం చాలనుకుంటాను నా అభిప్రాయంగా.

      తొలగించు
  2. ఇంగ్లీషు భాషన్నా పాశ్చాత్య తరహా చదువులన్నా తల్లితండ్రులకు ఉన్న మోజు తగ్గుతుందా? తగ్గాలంటే ఏమి చేయాలి? ఈ మౌలిక ప్రశ్నలకు సమాధానం ఇవ్వడం ఎంతో అవసరం.

    ఇకపోతే తెలుగేతర భాషల పరిస్తితి కూడా ఇంతే కదండీ. మరిన్ని భాషల (ఉ. మహారాష్ట్రలో గుజరాతీ, తెలంగాణాలో ఉర్దూ వగైరా) ఇంకా అధ్వాన్నం. అవి ఇంగ్లీషు & "రాష్ట్ర అధికార భాష" రెంటికీ గులాములే.

    అంచేత పద్యంలో తెలుగు బదులు భారత బాష అంటూ మార్చవచ్చునేమో ఆలోచించండి.

    PS: I am taking the views at face value without debate.

    ప్రత్యుత్తరంతొలగించు
    ప్రత్యుత్తరాలు
    1. ఆంధ్రేతరభాషల పరిస్థితి కూడా ఇలాగే ఉందా? నాకు తెలిసి తమిళులకు మంచి మాతృభాషాభిమానం ఉంది. అలాగే కన్నడిగులకూ స్వభాషమీద మక్కువ ఎక్కువ. తెలుగుచారి సంగతి ఇలా ఉంది. తెలంగాణాలో ఇప్పుడు ఉర్దూపరిస్థితి గురించి నాకు అవగాహన లేదు. కాని నిజాముల హయాంలో తెలుగు జీవఛ్ఛవంలాగా బ్రతికిందన్నది మాత్రం తెలుసు.

      ఇకపోతే మీరన్న ప్రశ్న ఇంగ్లీషుభాషావ్యామోహం తగ్గుతుందా అని - తగ్గదనే నా అనుమానం. ఇప్పుడు ప్రభుత్వాలే ఆంగ్లమాధ్యమం అంటూ తెగహడావుడి చేస్తున్నాయి. డబ్బులకోసం చదువులూ డబ్బులకోసం బ్రతుకులూ అయ్యాక, డబ్బులే విలువలూ వలువలూ అయ్యాయి మన ప్రపంచానికి. కాబట్టి పరిస్థితి ఇంకా దిగజారే లాగానే ఉంది.

      తొలగించు
    2. తెలంగాణాలో తెలుగుకు నిజాములనాటి దుస్తితి నేడున్నదా మాష్టారూ? అణచివేత - వ్యామోహం - మోజు ఎక్కువకాలం మనలేవు. మమకారమే మానవత్వాన్ని నిలబెడుతుంది. తెలుగుపై మమకారమున్నవారు తెలుగును చావనీయరు. తెలుగు చచ్చిపోతుందనేది భ్రమ. ఆ భయం వలదు. అమ్మలేని జన్మ ఉంటే తెలుగులేని వెలుగు ఉంటుంది. అలాగే ఇంగ్లీషు పై వ్యామోహం లేదా మోజు ఎక్కువకాలం ఉండవు. ఏ భాష ఎవరికి మాతృభాషగా ఉంటుందో దానిని వారు కాపాడుకుంటూనే ఉంటారు. ఏ భాషకూ ఏ ఇబ్బందీ శాశ్వతంగా ఉంటాయనుకోను.

      తొలగించు
    3. కొండలరావుగారి ఆశావాదం నచ్చింది.

      తొలగించు
    4. నిజాము కాలంలో తెలుగుకు ఎంతో దుర్గతి ఉండేదన్న ప్రచారానికి ఆధారాలు లేవు. మా తాతాజీ పేరు మోసిన తెలుగు కవి. ఆయనే కాదు వందలాది కవులు ఉండేవారు వారెవరికీ ఎప్పుడూ గౌరవానికి తక్కువ జరగలేదు.

      బడులలో మాతృభాషపై "నిషేధం", ఆంగ్ల మాధ్యమంపై మోజు, "మమ్మీ డాడీ సంస్కృతి" లాంటివి దేశమంతా ఉన్నదే. తెలుగు, కన్నడ, తమిళ, హిందీ వగైరాలు ఏవీ మినహాయింపు కాదు.

      తెలుగు వాడకం తగ్గలేదు పెంపోచ్చు ఎంతో పెరిగింది. డజన్ల కొద్దీ చానెళ్ళు, వందల్లో సినిమాలు, వందలాది బ్లాగులు, వేలల్లో పాటలు ఇవన్నీ ఇందుకు నిదర్శనం. అంతెందుకు కార్యాలయాలలో ఇంగ్లీషు మాట్లాడే/రాయగలిగే వారు కరువు అయ్యారు. కొద్దో గొప్పో ఇంగ్లీషు మాట్లాడే వారిలో కూడా అత్యధికులకు కనీస పట్టు కూడా కనిపించడం లేదు.

      అధికార హోదా లేని భాషలు రెంటికి చెడ్డ రేవళ్ళు అయినాయన్న మాట వాస్తవం. నా చిన్నప్పటికీ ఇప్పడికి పోలిస్తే ఉర్దూ (అలాగే తమిళనాడులో తెలుగు వగైరా) దయనీయ పరిస్తితికి చేరింది.

      తెలుగు (& తదితర భాషలలో) నాణ్యత కలిగిన సాహిత్యం అంతరించడం మొదలు అయ్యిందన్న బాధ నాకూ ఉంది. దీనికి కారణం సాహిత్యం యొక్క నిరాదరణ కానీ తెలుగు మీద తగ్గినా అభిమానం కాదు. కెవ్వు కేక లాంటి ఎన్నో నాసి రకం తెలుగు పాటలు రికార్డు బద్దలు కొట్టాయన్న విషయం గుర్తు ఉండే ఉంటుంది.

      తొలగించు
    5. Day-to-day lifeలో ఒక్కడు కూడా మాట్లాడని పెర్సియన్ భాష 1870 వరకు హైదరాబాద్ రాష్ట్రంలో అధికార భాషగా లేదా? నిజాం రాజులు తెలుగుకి పట్టించిన బూజు అంతాఇంతా కాదు. ఎన్ని air blowers పెట్టి దులిపితే ఆ బూజు పోవాలి?

      తొలగించు
    6. అధికార భాష ఏమిటి, నిజాము రాజ్యం బూజా కాదా లాంటి విషయాలు ప్రస్తుతానికి వదిలేద్దాం. ఆ "కాలం"లో తెలుగుకు పట్టిన దుర్గతి ఏమిటి? ఫలానా (ఒక్క) సభలో ఫలానా వారికి అవమానం జరిగింది అన్న (ఒకే ఒక్క) ఉదంతం కాక ఇంకేమయినా చెప్పండి.

      తొలగించు
    7. ఒకాయన (పేరు గుర్తు లేదు, ఆయన చెన్నమనేని విద్యాసాగరరావు బంధువు) అన్నారు "వాళ్ళ ఊరిలో ఉర్దూ మీదియం స్కూల్ ఉండేదనీ, తెలుగు చదవడం నేర్చుకోవడానికి కరీమ్‌నగర్ వెళ్ళాల్సి వచ్చిందనీ". సురవరం ప్రతాపరెడ్డి గారైతే కర్నూల్ జిల్లాలోని తెలుగు మీదియం స్కూల్‌లో చదివారు. మీరు సంస్కృతంలోని "ళ" పలకలేరు, సరే. మరి ఉర్దూలో ఉండే "Z" అయినా పలకగలరా? అటు సంస్కృతం గానీ, ఇటు ఉర్దూ గానీ మీకు రాకుండా పోయాయి.

      తొలగించు
    8. ఆయన ఎవరో నాకు తెలీదు కనుక స్పందించడం కుదరడం లేదు.

      మా తాత గారు హనుమకొండలో తెలుగు నేర్పించేవారు. ఆయన దగ్గర తెలుగు నేర్చుకోవడానికి ఆంద్ర నుండి కూడా వచ్చేవారు.

      నేనే కాదు మా నాన్న తాతలు కూడా మీరు చెప్పిన "ళ", z లు పలకడమే కాదు వాటిని ఆలోచించే వాళ్ళమే.

      తొలగించు
    9. ప్రవీణ్,

      మా సంగతి వదిలేయండి. మీరు ళ పలక గలరా? నేను ఒక చిన్న exercise ఇస్తాను.

      "కాళేశ్వరంలో కాలేయ చికిత్స"

      ఇది పది సార్లు రికార్డు చేసి Dropbox లో share చేయండి. ళ కి ల కి మధ్య ఎంత వ్యత్యాసం కనపర్చారో మిమ్మల్ని చూసి నేర్చుకుంటాం.

      తొలగించు
    10. నేను ఆలోచించేటప్పుడు "కళ" అనుకుంటాను, నాకు అది exotic కాదు కాబట్టి. పల్లెటూరివాళ్ళు "ళ" పలకలేరు. వాళ్ళతో మాట్లాడేటప్పుడు నేను "కళ"ని "కల" అనే అంటాను.

      తొలగించు
  3. ప్రత్యుత్తరాలు
    1. సత్యాలన్న భావనతోనే కదండీ వ్రాసుకొన్నది.
      మీకు నచ్చినందుకు ధన్యవాదాలు.

      తొలగించు
  4. మీ కవిత కొంత మేరకు వాస్తవమే అయినప్పటికీ, మాతృమూర్తికి మాతృభాషకు అంత దుస్థితి రాలేదనుకుంటానండీ. ఎవరో ఏదో అన్నారని మీలాంటి పండితులు నిస్పృహకు లోనవవద్దని మనవి.

    ప్రత్యుత్తరంతొలగించు
    ప్రత్యుత్తరాలు
    1. ఇప్పటికి వచ్చిన దుస్థితి మీరు సరిగా గమనించారా? తెలుగు ఇంట్లో పరిస్థితి ఎలా ఉందీ గమనించారా?

      ఎందరు అన్నం అంటున్నారు - ఎందరు రైస్ అంటున్నారు?
      ఎందరు బడి అంటున్నారు - ఎందరు స్కూల్ అంటున్నారు?

      అమ్మా అని పిలిచినందుకు పిల్లల్ని బాదిన టీచర్లు సరే, పిల్లని చితకబాదిన తల్లినీ చూసాను నేను.

      ప్రాథమికవిద్యాభ్యాసంలో ఎక్కడైనా మాతృభాషను 30%శాతం కన్నా తక్కువమంది నేర్చుకుంటుంటే ఆ భాష సుబ్బరంగా చచ్చిపోతోందని అర్థం. మరొక పాతిక ముఫై యేళ్ళలో తెలుగు సంఫూర్ణంగా చచ్చిపోయే అవకాశం దండిగా ఉందంటే తక్కువచేసి చెప్పటం అన్నమాట.

      ఇలా తెలుగుభాష మంచం పట్టి ఉంటే ఇంకా ఆశలున్నాయీ అని మీరు అనుకుంటున్నారు. ఈ చస్తున్న భాషకు ఎమేమి సదుపాయాలు ఎక్కువయ్యాయీ ఎలా తగ్గించవచ్చునూ అని కొందరు ఆలోచిస్తున్నారు - భాషాభివృధ్ధి కోసమే లెండి.

      ఏమిటో అంతా అయోమయంగా ఉంది!

      తొలగించు
  5. ఆ, చైనాలో ఉద్యోగాలు, జీతాలు ఎక్కువగా దొరికితే, ఇంగ్లీషు బదులు చైనీసు అంటారు. ధనం ఎక్కడ ఉంటే అదే గొప్ప, మనది లోకువ. అమ్మ ఐనా, అమ్మ బాష ఐనా. ఇది కుడా ఆ ఇంగ్లీషోడు ఎప్పుడో కనిపెట్టేశాడండోయి

    https://www.youtube.com/watch?v=DZkyYkKKnns

    ప్రత్యుత్తరంతొలగించు
  6. నదీనాం సాగరో గతిః...ఏమీ చేయాలేమండి

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.