27, మే 2014, మంగళవారం

రామ రామ యని నామము బలుకగ రాదో‌


రామ రామ యని నామము బలుకగ రాదో జనులారా
కామితఫలదుని ఘనతను పొగడుట కాదో మీ వలన


సుజనుల కెపుడు సుఖము నొసంగే సూర్యవంశవిభుని
విజయపరంపర వీనులవిందుగ వినిపించగ రాదా
॥రామ రామ॥

నిరుపమగుణనిధి పరమాప్తుం డిది నిశ్చయమే కాదా
పరమాత్ముని సంభావించుటలో పరమసుఖము లేదా
॥రామ రామ॥

చతురాననశివశక్రసంస్తుతుని శరణు వేడ రాదా
మతిమంతులరై మోక్షప్రదునిపై మనసు నిలుప లేరా
॥రామ రామ॥