26, జులై 2013, శుక్రవారం

రామకీర్తనలు -6 ఇది యేమి శ్రీరామచంద్రులవారూ, ఈ‌ వేళలో వచ్చినారూ

ఇది యేమి శ్రీరామచంద్రులవారూ
    ఈ‌ వేళలో వచ్చినారూ
ఇది వేళ యని దేవేరి సీతమ్మ
    ఈశ్వరార్చన నున్నారూ

మీ కళ్ళలోనీ మెరుపును జూడా
    మీరేమొ చెప్పాల నొచ్చారూ
సాకేత పురనాథ సమయాని కేమో
    జానకమ్మ పూజ నున్నారూ
శ్రీకంఠునీ పూజ చేసెడు వేళా
    శ్రీవారు దయచేసినారూ
మాకేమో పోయీ మనవి చేసేదీ
    మంచిదా మహరాజు గారూ    ॥ఇది యేమి ॥

జానకమ్మా పూజ ఝాము సేపుండును
    ఆనక జపమంత సేపుండు
భూనాథ భూపుత్రి పూజకు కూర్చుండి
    మూడు ముహూర్తంబు లైయుండు
ఈ నాడు తమరేమో ఏదో విశేషంబు 
    లేనిదె రారే సెలవిండు
తానై దేవేరి దయచేయు నందాక
    తాము విశ్రాంతి గైకొండు  ॥ఇది యేమి ॥

విమలప్రభావులై వెలుగు మీ భక్తులు
    సమవర్తి కైనను వెరచేరో 
తమ భక్తులెవరికి ధరణిజాతను గూడి
    దర్శన మీయగ తలచేరో
తమరిట్లు వచ్చేరు తహతహ లాడుచు
    భామిని దినచర్య మరచేరో
తమరు ధరణిజయు దైవస్వరూపులె
    తమరేమి లీలను తలచేరో  ॥ఇది యేమి ॥
    
(జూలై 2013)    

2 వ్యాఖ్యలు:

  1. వేళ కాని వేళ రాములవారు చూడాలని వస్తే సీతమ్మవారి కావలివారి బాధని బాగానే పట్టుకున్నారు!

    ప్రత్యుత్తరంతొలగించు
  2. ఇరవైయారు నెలల తరువాతనైనా ఈ‌గేయం మీకంటబడటం, మీరు స్పందించటం ముదావహం. సాక్షాత్తూ రాములవారికే No అని చెప్పాలంటే వారికి ఎంత బాధా , ఎంత ఇబ్బందీ అని!

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.