7, మే 2013, మంగళవారం

ఇదింకా బాగుంది

ఇదింకా బాగుంది
      అందరికీ నువ్వేల సమస్యవో తెలియదు
ఇంత పెద్ద సృష్టికి
      యెందుకు పూనుకున్నావో తెలియదు
అంతులేని సమస్యల
      వింతప్రకృతి మాయగోలేమిటో తెలియదు
అంతు తెలుసుకో
      చెంత చేరమనే పంతమెందుకో తెలియదు

నన్నడిగి నువ్వు
      నన్ను సృష్టించలేదనేది బాగా తెలుసును
నిన్ను నిలదీసినా
      యెన్నడూ జవాబు రాదని కూడా తెలుసును
ఎన్నడూ నీ‌ జాడ
      మన్నూ‌ మిన్నుల మధ్య దొరకదని తెలుసును
అన్నీ తెలిసినా
       నిన్ను వెదకటం‌ నేను మాన లేననీ తెలుసును

ఇదింకా బాగుంది
      వదలకుండా నీ కోసం వెదుకుతూనే ఉన్నా
పదిలంగా యెక్కడో
      మెదలకుండా నువ్వు మౌనం గానే దాగున్నా
అదంతే లెమ్మని
       హృదయంలో నిత్యం సరిపెట్టుకుంటునే ఉన్నా
అదోమిటో మరి
       వదలకుండా నిన్ను అనుక్షణం ప్రేమిస్తూనే ఉన్నా

ఇదింకా బాగుంది!