6, మార్చి 2013, బుధవారం

ఇది నీ విచ్చిన జీవితము

ఇది నీ విచ్చిన జీవితము
తుది యిది మొదలిది యని తెలియని యొక
నది వలెనే సాగి పోయేదీ

జడివాన వలె కురిసే నీ దయ
బడయగ చిడిముడి పడు చిరు నది వలె
సుడులు తిరుగుచూ సాగేదీ
వడివడి పరుగుల వయ్యారి యిదీ
  
నిలకడ యను మాటే లేనిది
ఉలుకుల కులుకుల ఉరుకుల పరుగుల
గలగలల విలవిలల నడకల
పలు గతు లలరగ ప్రవహించేదీ
 
నిను వెదకుచు భువి తిరుగునది
అనిశము నిను కన నారాటమ్మున
మినుముట్టగ ఘోషించునదీ
నిను కలసిన క్షణమున నీ వయ్యేదీ