25, ఫిబ్రవరి 2013, సోమవారం

నీ వాడ నైతిని నేను నా వాడ వైతివి నీవు

నీ వాడ నైతిని నేను నా వాడ వైతివి నీవు
నీ వాడ చేర రమ్మని నీ వేల పిలువవు నన్ను

వేచి వేచి నాకు చాల విసువు పుట్టే దాక నీవు
కాచుకొని యున్నా వంత కాని వాడ నెట్లైతిని
చూచి చూచి నేడు నిన్ను సుంత నిలదీసే నయ్యో
పూచిక పుల్లన్నా పోపో కడు నల్పుడ నైతి

పిలచిన తడవుగ తరచుగ కలల లోన  నిపించేవు
అలక లన్నీ నిన్ను చూచి నంత లోనె యణగారేను 
కలక దేరి తగవు తలపు గడచి మనసు చాల మురిసేనయ్యా
చిలిపివాడ యీ నాడైనా చెప్పవయ్యా పిలిచే దెపుడో

విచ్చిపోయే తనువుల దూరే పిచ్చిపనితో విసువొచ్చేను
గుచ్చి హింసపెట్టే ప్రకృతి గొడవలతో విసువొచ్చేను
మెచ్చి స్వస్వరూపజ్ఞాన మిచ్చితివి కడు మేలయ్యేను
వచ్చి ముచ్చ దీర్చమంటె పలక విది వింతయ్యేను

2 వ్యాఖ్యలు:

  1. విచ్చిపోయే తనువుల దూరే పిచ్చిపనితో విసువొచ్చేను
    చిలిపివాడ యీ నాడైనా చెప్పవయ్యా పిలిచే దెపుడో


    మీరింకా చిన్నవాళ్ళు అలా అంటే ఎలా? :)

    ప్రత్యుత్తరంతొలగించు
  2. శర్మగారూ,
    ఇలాగు వచ్చినందుకు మీరు ఆశ్చర్యపోవటం సహజమే. కాని కీర్తన వెలువడటంలో నా ప్రమేయం చాలా తక్కువ. అది యెలా బహిర్గతమయ్యేదీ కేవలం భగవదేఛ్ఛ మాత్రమే. కరచరణాద్యవయవసంపుటీకరణమైన ఈ శరీరం నాకు కేవలం ఉపాధి మాత్రమే నన్న స్పృహ నాకు నిత్యం. కాని యీ మాట బయటికి అంటే లోకం నన్ను డాంబికుడు అనుకుంటుంది. అలాగని లౌకిక జీవనం పట్ల అశ్రథ్థ యేమీ లేదీ‌ జగన్నాటకంలో.

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.