7, జూన్ 2012, గురువారం

చిరుచిరు తృణకుసుమాల పూజలు చేకొనగలవా దేవా

చిరుచిరు తృణకుసుమాల పూజలు 
     చేకొనగలవా దేవా
మరిమరి మురియుచు నీ కందీయగ 
     మాకడ నేమియు లేవుగా

మా మా రేకులు మరియును చిన్నవి 
     మంచి వర్ణములు లేనివి
కోమలములు గా వేమియు స్వామీ 
    యేమను కొనక గ్రహించవే

మధురమధురములు మకరందంబులు 
     మాకు కొంచెమును లేవుగ
వ్యధలే గాని సుధలే లేని 
     వారము స్వామి గ్రహించవే

సుమనోహరములు సుకుమారంబులు 
     సొంపగు వాసన లెరుగమయా
విమలోదారము లమరు మనంబులు 
     వేడుక తోడ గ్రహించవే