31, మే 2012, గురువారం

పూవులు చాలా పూచినవి నీ పూజకు తరలి వచ్చినవి

పూవులు చాలా పూచినవి నీ పూజకు తరలి వచ్చినవి
కోవెల వాకిలి చేరినవి నెత్తావులు జిమ్ముచు నిలచినవి

రంగురంగుల రేకులతో ఉప్పొంగే తీయని తేనెలతో
పొంగుతు నీకై విరిసినవి గుడి ముంగిలి చేరి వేచినవి
బంగరుతల్లులు పూబాలలు చేరంగ వచ్చెనీ చరణములు
మంగళకర నీ వెరిగినదైనను సంగతి విశదము చేసితిని

మాలాకారులు సూదులు గుచ్చగ లోలో నిన్నే తలచినవి
వేళకు నీ గళ సీమకు చేరగ వైళమ గుడికి చేరినవి
బేలలు పూవులబాలలు ఆశగ వేచియున్నవి చూడవయా
కాలము గడువగ నీయకయా మాలలు వాడగ నీయకయా

ఎంతో తపమును చేసినవి నీ చెంత చేర ప్రభవించినవి
సంతోషముగా నీ గుడి వద్దకు సరగున వచ్చి చేరినవి
అంతర్యామివి పూలపాపల అంతరంగముల నెరుగుదువు రా
వింతువుగా మన్నింతువుగా నీ వెంతయు కరుణామయుడవుగా

10 వ్యాఖ్యలు:

  1. సార్, కవిత చాలా ఉన్నతంగా ఉన్నది , వచన కవిత్వమే అయినా పదాలు కొన్ని అర్ధం కాలేదు " వైళమ " ఈ పద అర్ధం తెలియ లేదు . మీరు చాలా బాగా రాస్తారు. పుష్ప విలాపం చదివినట్లుగా ఉంది

    ప్రత్యుత్తరంతొలగించు
  2. ఫాతిమా గారు,
    మీకు నచ్చినందుకు సంతోషం.
    మీరన్నట్లు ఈ రచనను వచన కవిత్వంగా చదివి ఆనందించ వచ్చును.
    పాటగా గానం చేసుకొనీ ఆనందించ వచ్చును.

    వైళమ అన్నది వైళముగా అన్నదానికి రూపాంతరం. వైళముగా అంటే త్వరగా అని అర్థం.
    తెలుగుసినీసాహిత్యానికి యెక్కిన తెలుగు మాటయే యిది.
    శ్రీకృష్ణార్జున యుద్ధము (1962) సినిమా కోసం శ్రీ పింగళి నాగేంద్రరావుగారు వ్రాసిన పాట ఉంది
    స్వాముల సేవకు వేళాయే సైళమ రారే చెలులారా
    ఆశీర్వాదము లభించుగా చేసే పుజలు ఫలించుగా
    అనే పల్లవితో సాగే యీ పాటను శ్రీమతి సుశీలగారు గానం చేసారు.

    ప్రత్యుత్తరంతొలగించు
  3. చాలా బాగుంది. పూల మనసేమిటో.ఎంత చక్కగా చెప్పారు. ఏ పూలైనా స్వామి పాదాల దగ్గరకు చేరాల్సినవే కదా!
    చాలా చాలా బాగుంది. ధన్యవాదములు.

    ప్రత్యుత్తరంతొలగించు
  4. చాలా బాగుందండీ!
    పూల మనసులో చేరి వ్రాసినట్లు ఉందండీ!
    @శ్రీ

    ప్రత్యుత్తరంతొలగించు
  5. మీ రాత ఒక రెండు వాక్యాల ఆలోచనకు కారణమైంది....

    చెట్టు /కొమ్మ - భర్త
    పువ్వు - భార్య

    మీకు విచిత్రంగా అనిపించవచ్చునేమో కానీ వేరుపడిన భార్య వితంతువయ్యిందేమో అనిపించింది ఈ క్షణంలో....ఆ వితంతువుకు ఈ పాదాలే "మోక్షం" అని ఆ దయామయుడు నిర్ణయిస్తాడేమో అని కూడా అనిపించింది....ఇంకా చాలా అనిపించినై కానీ, మీలాగా ఊపు ఉన్న కైతలు రాయగలిగే రాతగాడిని కాదు కాబట్టి ఆపేసా.... :)

    అయితే వేరుపడిన / వితంతువైన భార్యను ఆదరించేవారు కొందరు, నలిపేసేవారు కొందరు, ఆశీర్వదించేవారు కొందరు - అది వేరే సంగతి...

    ప్రత్యుత్తరంతొలగించు
    ప్రత్యుత్తరాలు
    1. వంశీమోహనుగారూ
      చెట్టు లేదా మొక్కకూ దానితో పూవుకూ కల అనుబంధం తల్లీబిడ్డా బంధం.
      కవులు సాంప్రదాయికంగా యిలాగునే భావించి వర్ణించటం జరుగుతోంది.
      మీరన్న భర్త-భార్య సంబంధం అసంగతంగా అనిపిస్తొంది. ఈ అసంగతమైన ఊహను మీరు మరికొంత దూరం సాగదీసారేమో.

      తొలగించు
  6. వంశీ మోహన్ నీది ఎంత విషపు ఆలోచన. పువ్వు నేలరాలితే" ఆదరించే వారు కొందరు నలిపేసేవారు కొందరు, ఆశీర్వదించేవారు కొందరు - అది వేరే సంగతి." ఇలా అనిపించిందా? మీ సొంత పూలతోటలో ఎన్ని పూలు విడివడ్డాయి ఆ పూలని ఎంతమంది ఆదరించారు,ఎంతమంది ఆశీర్వదించారు ,ఎంత మంది నలిపేసారు?భలే నిరూపించుకున్నావే.

    ప్రత్యుత్తరంతొలగించు
    ప్రత్యుత్తరాలు
    1. మీరు చెప్పింది నిజం. చక్కటి కవితను ఆస్వాదించక, కొందరికి అలాంటి నీచ నికృష్టపు ఆలోచనలు ఎలా వస్తాయో కదా.

      తొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.