17, మే 2012, గురువారం

కోరి కోరి వచ్చితినా కువలయమునకు

కోరి కోరి వచ్చితినా కువలయమునకు నిన్ను
చేరి యుండియుండి విసివి చెడిపోయితినా

అచ్చట లేకున్న వేమి యిచ్చట గలవయ్య
ముచ్చటలా మురిపాలా మోహ మేల గాని
యిచ్చకాలు మాని యింక నెప్పటివలెనే
వచ్చి తొల్లింట నుండ వచ్చు ననుము రామ

నిను గన రానట్టి చోట నెట్టు లుందు నయ్య
మనుజలోకవిలాసాల మాట యేల గాని
కనుగొని నా తహతహ నిక కనికరించ వయ్య
వెనుకటి వలె నుండు మనుచు పిలిపించుము రామ

మాయ తిత్తులందు నేను మసలు టెందు కయ్య
ఆ యము డను వాని తోడ నల్లరేల గాని
న్యాయ మెంచి మునుపటి వలె నన్ను కటాక్షించి
హాయిగ నీకడ నుండగ నాన తిమ్ము రామ