22, ఏప్రిల్ 2012, ఆదివారం

నేనెరిగిన దెల్ల నీ కొఱకై మానక ధ్యానము చేయుట

నేనెరిగిన దెల్ల నీకొఱకై
  మానక మరిమరి ధ్యానము చేయుట
నేనడిగిన దెల్ల నా కొఱకై
  నీ నిజరూపము మరి మరి చూపుట

భ్రమలను విడచిన దేహిని గాను
  శమదమంబుల విధులే నెరుగను
అమలిన సహజోదారప్రేమమున
  నిముసము విడువక నిను భావింతును

లోకక్రియోపరి నిష్టుత దేనికి
  నీకు మెప్పుగా నిలువగ లేనిది
నీకై మనసే ముడుపు గట్టితిని
  నా కెరుకగు నటుగా కొలుతును

నను చేసినదీ నీవని  యెరుగుదు
  నను నడుపునదీ నీవని యెరుగుదు
ననునిను నొకటిగ నాత్మ నెరుగుదు
  కనుకనె  నిను చూడక నెటులుండుదు

2 వ్యాఖ్యలు:

  1. అమ్మో తెలుగులో ఇన్ని క్లిష్టమైన పదాలున్నాయా?

    ప్రత్యుత్తరంతొలగించు
  2. అనికేత్,
    మీ పేరులోనే రెండు క్లిష్టమైన పదాలున్నాయి కదా? ఆలోచించండి.
    అయినదేమో అయినది. తెలుగు సంస్కృతంతో మమేకం అయింది.
    రెండూ సుందరమైన అజంతభాషలే మరి. సరే పై గేయం దగ్గరకు వస్తే అంత క్లిష్టమైన పదాలేవీ ఉన్నాయనుకోను. నిజానికి సాంప్రదాయిక తెలుగుసాహిత్యం అలవాటుగా చదివేవారికి అన్నీ తెలిసిన మాటలే అనుకుంటాను. మీకు అవుసరం అయిన పదాలకు http://www.andhrabharati.com/dictionary/index.php చూడండి.

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.