6, నవంబర్ 2011, ఆదివారం

నీ కోసం కట్టిన యీ గుడిలో రాకాసులు యెటులో చేరినవి


నీ కోసం కట్టిన యీ గుడిలో
    రాకాసులు యెటులో చేరినవి
నీ కొలువు కెవరూ రాకుండా
    వాకిటనే అవి కాపుండినవి

రసనారాజద్వారము ముంగిట
    నామము లాడుట యాగినది
చెవుల గుమ్మముల చెంగట మ్రోగే
    శుభగుణ గానము లాగినవి

నేత్రద్వారములందిచే శుభ
    హారతి వెలుగులు సమసినవి
సకలద్వారముల పూజాప్రకరణ
    విధులను మూకలు మూసినవి

దేహాలయమున నరిషడ్వర్గము
    దూరిన దెటులో తెలియదయా
పూజలాగినవి వేగమె వాటిని
    తరిమే దెటులో తెలుపవయా

5 వ్యాఖ్యలు:

  1. దేహదేవాలయంలో చేరిన అరిషడ్వర్గాల గురించిన మీ గేయం చాలా బాగుంది.

    ప్రత్యుత్తరంతొలగించు
  2. నిస్సందేహంగా ఇది చాలా చాలా మంచి కవిత.భేష్. భాషా వికాసం గురించి మీరు రాసిన వ్యాసం కూడా ఆలోచింపదగీనదీ కవిత్యం రాసేవారికి కనువిప్పు కలిగించేదిగానూ ఉంది.

    ప్రత్యుత్తరంతొలగించు
  3. chalaa bagundi. mee numchi inkaa manchi kavithalu asistunnamu. nirantara kavitha prakriya meenityakrutyamkaavali

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.